di Manfredi "Freddy" Adamo

No eh? Stavota nun me songo scurdato. Pure si mmiez’ ‘a semmana, come tutte le partite di Coppa, ccà se fatica. ‘E napulitane faticano, sinò nunn’emigravano! Je pure fatico, mi presento sono Don Ciro ‘o guardaporte, masto acconciasegge, pasturaro (accummencio solo doppo la Festa di San Gennaro, però) e na vota pure franfelliccaro* e cannavaro*.  Il nostro vascio per l’occasiona diventa un Extravascio! Robba ‘e lusso, se parla ‘e pallone. E’ passata pure ‘onna Lucia ‘a via d’ ’e quatte e meza. Eleganta e mai sposata, insegnante stimata, ll’avita sentere quanno parla d’ ‘o Napule! Tene ‘a pepitola ‘mmocca, mò parla di De Laurentìs, po’ cuffèa* a Benitèz e pare ca tutt’’e jucature song figlie d’ ‘e suoje. Ve ‘a facite nemica se per un impeto di sfastèreo mannate a chillu paese chi nunn’ ha saputo signà nu golle o chi (pare) nun s’impegna. Nun ve dico comme trattaie a Carmeniello ‘o riggiularo quanno Ferrario vuttaie ‘a palla dint’ ‘a porta soia… Carmeniello diceva ca s’erano vennuta ‘a partita, ‘a maglia nunn’a ‘nfunnevano e ‘onna Lucia, ‘a copp’ ‘a mano, lle dicette ca cu chella coscia favesa ca teneva, vuleva vedè si isso, Carmeniello, era ca..nzo di correre addereto a nu pallone meglio ‘e Ferrario. Povero Carmeniello… ma ‘onna Lucia me dicette, doppo ‘a disturbata: ”Don Ciro, chi se magna e ppecure mèje a poco a poco adda cacà pure ‘a lana". Azzz!!!! Da allora, massimo rispetto pe’ Donna Lucia!!
Generalmente quanno joca ‘o Napule, ddoie, tre ore primma d’’a partita tengo ‘e ccose meie, quacche ricorrenza, che saccio… nu cazettino ‘o ccuntrario, accummencio a sagliere ‘e scale sempe co ‘o pere mancino, cose accussì ma stasera (mannaggia giovedì mmiez’ ‘a semmana) nunn’aggio avuto ‘o tiempo. Dint’ ‘o vascio ce sta sempe quacche cosa ‘a fa. Per esempio, primma d’ ‘a partita, già penzava ‘a scarola di mia moglie, bella reccia e prufumata. Mi aveva detto che me la faceva trovare tutta appriparata, primma della partita, perché poi mi dovevo spostare sulla seggia a vedere la tivvù con l’antenna in mano e comme facevo a magnà? Vicino ‘a fenesta, solita posizione strevesa, na mana pe’ ll’aria tipo “statua-libertà” e chell’ata pronta all’uso si pe’ dint’ ‘a televisione marcano a peste*, capisce a mme... Dicevo… già tenevo ‘ncapo ‘a scarola ‘e muglierema, ma Zì Vicienzo me chiamma (ne succede sempe una, o’ vvìde?) perché teneva astipata na marenna 'ncoppa 'o banco, arravugliata dint' 'o maccaturo* 'e carta, e mo' nce sta sulo 'a carta 'nzevata. E chi è stato, Zì Viciè?? …”'a jatta d' 'o vascio”! Jammo a cercà sta jatta ma niente, nun se trova. Puveriello sulo sta marenna lle luceva a stu cristiano e pe’ tremente già s’erano fatte ll’otto e meza… ll’avette ‘nvità a casa, ‘a partita steva accummencianno. “Zì Viciè.. muglierema Patrizia ha fatto na bella scarola stasera, purtateve nu piatto, è robba sopraffina! La scarola fritta di mia moglie è la più bona di tutt‘e Quartiere!” Votta a me, piglia a tte, ma sine, none, ‘nzomma na guerra, alla fine gentilmente metto ‘o piatto mmano a Zì Vicienzo e n’ ‘o manno: passata la famme! Giusto ‘o tiempo ‘e na sciacquata ‘e faccia e appiccio la tivvù. Nun pozzo fa sta vita. 30 partite accussì, je sulo, tutto stuorto cu st’antenna mmano. Tengo n’età, m’aggia ‘ndustrià, quacche ccosa m’aggia inventà, ma mò nun ce sta tiempo. Don Salvatore, portatore sano di saggezza, stranamente nun parla e me saluta a malappena. Pare ca ‘e penziere suoje veneno e vanno comme ll’onne de lu mare; è anziano assaje e nonostante la differenza di ceto è sempe stato nu buono cristiano cu’ mme e cu tutto ‘o vascio.
La partita accummencia. Che bellu pubblico, quanta ggente a festa, che appucundria*… songo esattamente 23 anni ca manco d’ ‘o San Paolo, dall’urdema partita del pataterno-Diego, marzo 1991. Ogne striscione lo ricorda, ogne bannera porta ‘a faccia soja. Delaurentìs quanno ce ne puorte n’ato accussì? …Ma hanno jettato ‘o stampo. ‘A passata, tenévamo ‘o Matador, ma s’è visto che brutto cristiano ll’hanno fatto addeventà ‘e denare. Nun tengo tiempo (e forza, a causa della posizione strevesa per vedere la parabbola) ‘e sta troppo annanze alla tivvù pe’ cuntrullà, ma spero cu tutto ‘o core ca nun se fa cchiù ‘o segno d’ ‘a croce quanno fa gol!…che ‘ppucrusia. Uè!! Noooo, mannaggia ‘a marina! Che gol ca s’ è magnato ‘o nanetto. Mammà, dopo 5 minuti già tre azioni importanti. Don Rafele ‘a coppa ‘a panchina ha visto bbuono. Pandev fa gol, na jucata ‘a campione. Doppo mezz’ora già stammo a 7 azioni da gol ma uèèè avimma signà!! Sti purtuvalle nun m’ ‘a contano justa, stu purtiere è troppo bravo!  Nooo ma che d’è?? Troppe occasioni sfummate, troppi gol magnati che la metà mi abbastano e porto pure ‘o riesto alla Patrizia mia ca nun m’appriparasse la marenna per una semmana sana! Nientedimeno avimmo pariggiato!?.... Vabbuò va, cunzulammece pecché simmo stati o’veramente tuoste, ma forse ‘a Coppa pe’ chist’anno, nun era cosa nosta. Il grande “Palo ‘e fierro” (ogne ttanto m’ ‘a guardo chella fotografia cu isso al Club Napoli Materdei) nun l’avesse fatto manco accustà all’area di rigore, ma chiste songo guagliune e hanna a crescere. Penzammo sulo ‘o campionato e dummeneca assera putimmo studià pure la squadra che ci contenderà l’ultima coppetella rimasta. E intanto Don Salvatore suspira, ‘ncoppa ‘a fenesta soia: “’O munno è munno: chi saglie e chi va a funno! Occasione e maccarune se magnano caure!!*”

*Franfellicaro = venditore di bastoncini zucchero caramellato.
*Cannavaro = venditore di tessuti di lino e canapa
*Cuffeare = fare il verso, prendere in giro
*Marcare a peste = portare male con parole e/o atteggiamenti
*Maccaturo = fazzoletto
*Appucundria = nostalgia
*Occasione e maccarune se magnano caure = Quel che è stato è stato è inutile rammaricarsi ma pensare ai rimedi