di Manfredi "Freddy" Adams

Vi avevo confidato che, grazie ‘o nepote ‘e Don Salvatore, me putevo vedé ‘e ppartite d’ ‘o Napule ma me fa male ca, doppo ca pavammo tanta sòrde, stammo sempe a ce ‘ntussecà pe’ chello ca diceno ‘nguollo a nnuje, ce sfruculeano con commenti maliziusi. Me songo sfasteriato! Basta, me sento ‘a radio, accussì, arrefresca tutte ll’aneme d’ ‘o Priatorio, me pozzo arrepusà ‘ncoppa a na pultrona, basta posizioni strevese sulle segge pe’ tenè mmano n’antenna, e po’ comme ringraziamento, aggia pure sentere ‘nfamità… Si torna all’antico. Doppo sta bella mangiata d’ ‘a viggilia ‘e Pasca (Sortù de risi mbuttunato de pesce - Pagnottelle a la tedesca - Pasticcio de pesce - Merluzzo a fette fritto o volluto co la sauza acre e doce) mi sono collegato con Udine e la fida radietta dint’ ‘e rrecchie, scofanato.

Avimmo fernuto di mangiare un tanteniello primma, embé la partita pummeridiana, ma ‘o stesso me songo cunsulato, come sempre, comme ogne Pasca! ‘E pruffume dint’ ‘o vascio e pe’ tutta Napule se sentevano suspirà comme ‘e nnote della poesia di Salvatore Di Giacomo “pianefforte ‘e notte”; un via-vai gentile per le strade, aria ‘e pace. Muglierema e tutte ‘e femmene d’ ‘e Quartiere dal Giovedì Santo se mettetteno a ppriparà tortani e pastiere, ‘o tavolo nuosto era chino ‘e rrobba! ‘A matina d’ ‘o Sabbato Santo tre pastiere ‘e grano m’hanno quasi fatto scurdà ca ce steva ‘a partita: ‘a pastiera col suo pruffumo è un dolce ca te riala allerìa*. Comm’è bbello dint’ ‘a casa chill’addore, che poesia. Se racconta ca ‘a Riggina Santa, femmena austera e tutta d’un pezzo, ‘nzorfata* dal marito (guliuso*) Ferdinando II, se facette convincere e assaggiaie ‘na granda fella ‘e pastiera. Chella bella faccella janca s’alluminaie e pe’ na vota facette nu bellu sorriso al marito Re che, a’ coppa mano*, ordinaie a tutte ‘e “monzù”* di appriparare la pastiera tutto l’anno e nun sulamente a Pasca, si no vedeva ‘a resata d’ ‘a mugliera sultanto ‘na vota all’anno. Quanno fanno ‘a pastiera me pare ‘e sentere cantà Donna Lucia mentre appripara: “Guarda-guà stu vascio è chino, siente-sié sti ciure arancio, nu pruffumo accussì fino, dint’ ‘o core vo’ restà…” Comme simmo belli nuie napulitane, ‘a tradizzione ‘a facimmo addevetà elevazzione. Si, elevazzione spirituale!

Puntuale appiccio la radio e metto in atto la mia protesta, pure si piccerella. Nun voglio cchiù vedé jucature fallute ca se permetteno ‘e sparà stru..mmuliate contro a nnuie, ll’anno che vene facimmo ‘e cunte. Don Salvatore affianco nun se n’è accorto, tenimmo ‘e ffeneste chiuse pecché ‘sta Pasca è venuta accussì, nu friddo ca a Avellino ha fatto pure ‘a neve… Peccato nun ce sta cchiù Enrico Ameri né Sandro Ciotti: si chiudive ll’uocchie, lloro t’ ‘a facevano vedé ‘a partita, ti aggarbavano le giocate come voleva il tuo cervello e quanno ‘a sera vedive ‘e gol alla Domenica Sportiva, erano precise accussì comme ll’avive sentuto 7-8 ore primma.

Da quello che stevo sentenno, ‘o Napule steva jucanno bbuono, senza affondi ma senza rischi, il gol del torero triste m’ha scarfato ‘o core anche perché dint’ ‘a radietta dicevano ca ‘e soliti scieme ci stavano dedicando le canzuncelle sul Vesuvio e sulle nostre origgini (Uè, manico ‘e fetiente, quanno nuie arraggiunàvamo ‘e filosofia, vuie stiveve fraciti dint’ ‘e ppalude). Ma è il secondo tempo che mi ha nu pucurillo ‘ntricato: manco ‘o tiempo ‘e accummencià e i nostri generosi jucature, già tutte ‘e quinnece addeventate Napulitani, soprattutto ‘o purtiere che vulimmo Sinnaco subbito, col buon cuore che ci contraddistingue ‘mpacchettano ‘o rialo*! ‘Sta teoria è bbona però si ‘a facite sulamente a Pasca, ammagaro a Natale, ma no sempe….. Dopo il solito rialo, pare c alloro se songo guardati ‘nfaccia e hanno ditto: “Chiste songo brava ggente, jammece a piglià n’atu cadò!” Pe’ dint’ ‘a radietta sentevo ca ll’Udinese attaccava, spingeva, aveva pigliato curaggio doppo ca ‘Nzigne e Zappatone s’erano magnate ‘e gol pe’ chiudere la pratica.

Se vede ca ancora nunn è ora ca schioccano ‘e vverole*… Pareggio giusto secondo la radio anche se la casacca gialla (‘na vota se chiammava “giacchetta nera”, ma pe’ ‘e ffà parè cchiù simpatici addirittura se songo vestuti di lillà…) non ha visto il fuorigioco sul pareggio loro e nu rigore sacrosanto su Pandevve. Stavota non aggio visto, ma vi conziglio a tutte quante di provare la radietta, ha sensazioni antiche, sviluppa la fantasia e soprattutto è aggratiss!

Nel Santo giorno di Pasqua da perzona anziana vulesse fà ll’auguri a tutte quante, a chi sta bbuono e a chi sta malamente. A chi se riesce a godé famiglia ed affetti e a chi scumbatte pe’ na malatia, pe’ nu lutto, pe’ na fatica scippata. Fiducia nella vita, Pasca significa Rinascita, guagliù…

Pigliateve ‘o bbuono quanno ve vene, ca ‘o malamente nun se piglia scuorno ‘e trasì dint’ ‘e ccase!

*rialare allerìa = regalare allegria, donare benessere

*’nzorfare = insistere, sollecitare

*guliuso = goloso

*’a coppa mano = in quello stesso istante

*monzù = cuoco di corte, derivazione partenopea del francese monsieur

*rialo = regalo

*schioccano ‘e vverole = scoppiano le caldarroste (metafora: tempo per maturare)