di Manfredi "Freddy" Adamo

Hai voglia ‘e te cunzulà cu stu fatto ca Rafa Benitèz ce sta facenno crescere ‘e mentalità; contro ‘a Juventùsse in palio nun ce stevano sulamente tre punti! Napoli-Juve è la partita. Certo ‘o Napule è cresciuto: ‘o Presidente se piglia ‘a cunfedenza cu’ Bayern e ll’Arsenalle e nuje nun campammo cchiù, calcisticamente parlanno, ‘ncoppa a chella partita sulamente, ma quanno s’avvicina ‘o juorno, e che vvuo’ fa, ‘o sfizio ‘e na granda paliata alla vecchia Signora ce fa sempe addecreà! V’arrecurdate ‘e ffacce d’ ‘e purtiere quanno ‘e nuoste, di cielo vestuti, lle scarrecavano fulmini e arcobaleni (Bertucco nel 1958 al Vomero, Cané nel 1973, Maradona nel 1985, Cavani nel 2011)? Chello ca succedette ‘a finale d‘ ‘e partite fa parte della storia del calcio e della città: ‘a sfilata d’ ‘o Presidente Lauro doppo ‘a partita, ‘a ggente ‘ncoppa ‘e bbalcune a noleggio, ‘e carusielle d’ ‘e scugnizze, ‘e bbannere cu Maradona, ‘e ffotografie del Matador… Napoli-Juventùsse s’avesse ascrivere nelle paggine di Politica Estera, di antropollaggìa: è il riscatto del brigante sull’invasore piemontese tosto, e per un giorno la Quistione Meridionale se mette a posto! È il riscatto del puveriello ca va a faticà addo’ padrone e lle dice: “Gnorsì, ogge cumanno je”!!  E’ la Giustizzia che fa pusà, a chi se veste ‘a carcerato, scudetti arrobbati e prepotenti; è la dovuta punizione del terrone venduto che secutammo* a Napoli e sfottono pure a Torino, ‘sti tifusielli nostrani citrulli e dementi. Razza malata, cu’lloro me piglie ‘a meccacanna*. Per l’occasione dint’ ‘e Quartiere è asciuto n’ata vota,  chillu striscione che ddice: tu che tifi Juve, sì na lota!!
Passaje Donna Lucìa ajere mmatina. Nun ve dico tutto ‘o Rusario ca putette scarrecà contra sta brutta razza: “S’avessano mettere scuorno!” - me dicette all’intrasatta*. “Comme se po’ ffa, gente napulitana ca s’abbraccia a chille razziste fetiente… nun ce pòzzo penzà! Ma se vònno rendere conto ca quanno diceno <<Vesuvio lavali col fuoco>> ce ‘a teneno pure cu’lloro?” Faticavo a tenerla quieta, n’a’ppoco lle pigliava na mossa: “Don Ciro ma se po’ essere cchiù strunze? Chiste vanno pure a Torino, s’ammescano mmiez’ a lloro e cantano <<Io odio Napoli>>!”... “Donna Lucì voi siete una bella persona, nun ve pigliate collera accussì. Don Salvatore nuosto, grande conoscitore di storia patria napolitana, quanno parla ‘e sta brutta razza dice sempe che, ‘e juventine meridionale hanno dentro di loro inculcato un certo DienNÀ, quello dei tiempe della conquista del Sudde, quanno surdate e bersagliere abusavano delle nostre donne. Sarrajeno loro discendenti, che v’aggia dicere… Una brutta storia!” Nun l’avesse maie ditto, Donna Lucìa addeventaie sempe cchiù arraggiata: “Jatevenne!! Jate a squaglià a Torino, site ‘o scuorno ‘e sta città!” A fatica ‘a facette cagnà discorso, a Napule ‘a dummeneca è sempre una bona occasiona per discutere del pranzo e del tempo. Infatti essa teneva mmano na bella sporta ‘e mulignane e puparuole, zucchine e fungetielle. ‘O rraù sicuramente pippiava placido ‘a quacche oretta, e la bella giornata invitava a fare due passi a Via Toledo. Bellu pomeriggio dint’ ‘o vascio. Na brutta vernata è passata e ‘o sole s’è fatto vedè fino a tarde. Po’… è stato ‘o mumento d’ ‘a partita. Me songo arrecurdato a tiempo a tiempo di una vecchia filastrocca ‘e Donna Lucia: “Uocchie e maluocchie e furticielle all'uocchie: schiatta la 'mmidia e crepano 'e maluocchie”. Sperava ca fosse di buon auspicio. Partiti!! ‘O Napule m’ha fatto subbeto addecrià, dint’ a nu quarto d’ora ‘o Buffone aveva ggià fatto tre parate a miraCulo e lloro nun cumbinavano niente. Azz… pensava, chest’è pecché stanno vinte punte annanze? Arrivaie pure ‘o gol del torero triste Calleiò, quanno segna isso ‘o Napule vence sempe… granda partita! Nun l’avimmo fatte capì niente, schiattate ‘a capa e sfuttute cu nu grande torello finale. Il digestivo finale (muglierema Patrizia aveva appriparate na bella pizza chiena) è stata ‘a faccia ‘e parrucchino, che a finale s’è permettuto ‘e dicere ca steveno in emergenzia, e chesto pecché mancavano sulamente dduje ‘e lloro. E nnuie allora? Avimmo perzo tanta partite e siccome in emergenza evidente, senza jucature ‘a na vita, il nostro ciacione ‘ncoppa ‘a panchina non ha mai lamentato gli infortunati ma ha sempe arrangiato cu chello ca teneva, senza scuse. Questione di stile.
Me jette a cuccà cuntento ajere assera, pure si nun cuntava niente per la classifica finale, vàttere ‘a Juventùsse è sempe nu sfizio sapurito. Don Salvatore nun ce steva ‘a casa soia, ‘o ‘nvitaie ‘o nepote, ma songo cierto ca doppo ‘a partita se fosse affacciato ‘o vascio e m’avesse ditto: “N’ora ‘e cuntiente fa scurdà’ mill’anne ‘e turmiénte”. E chest’è!!
 
*secutare = inseguire, perseguitare, tormentare
*Piglià ‘a meccacanna = Tenere a distanza le persone
*All’intrasatta = all’improvviso